Sí, êv’ ‘a succedere, guagliú e ssuccedette! Comme avevo prunusticato, ajere a ll’ora ‘e ll’apritivo (aperitivo) ‘o Napule jette a rReggio Emilia e ghiette a mmazzulià [pure si sulo pe uno a zzero, addó i’ me fósse aspettato ‘na nichessa (vittoria) cchiú llarga], jette a scunfiggere ‘a scuatra ‘e culo’echiummo facenno ‘nu bbuonu passo annante ‘ncrassifica e ddànno ‘na mana a ddon Rafele, ca – si nun se fósse vinciuto – avesse ancòra avuto a cche ffà cu ‘a cuntestazzione ‘e cierti tifuse [ca, pe pparta mia, nun so’ ddigne ‘e chistu nomme]. Sí, êv’ ‘a succedere, guagliú e ssuccedette; se vincette [pure si sulo pe uno a zzero,e ppure si ‘o Pipita nun se sbluccaje ancòra, ma ‘ncumpenso fove ‘o meglio d’’e vintiduje ‘ncampo, allimmeno nfi’ a cquanno se jucaje a ppallone e nno a ppalla fa’ tu comme dinto a ll’urdimi vinte minute; fove ‘o meglio ‘ncampo e ‘o capolavoro ‘o facette quanno guvernaje a mmestiere ‘o pallone ‘ncopp’ô lato ‘e mancina d’’a camma (area) emigliana e ‘a depositaje‘ncopp’ô lato ‘e dritta annante a cCagliecònno ca nun se facette prijà e mmettette dinto ‘o pallone ca ce cunzentette ‘e purtarce â casa ‘e tre ppunte â faccia ‘e chi ce vo’ male e de chilli quatto tifuse [ca, pe pparta mia, nun so’ ddigne ‘e chistu nomme]; se vincette e ffinalmente, p’’a primma vota ‘o Napule nun êtt’ ‘a ‘ncassà nisciunu stuco (gol).
Passammo ê ppaggelle:
RAFAEL 6 – Jurnata relativamente tranquilla p’’o guardiano cuano ca mustraje sicurezza e tranquillità pure chelli ppochi vvote ch’êtt’’âscí. Sudaje friddo isso pe pprimo sulo ‘na vota quanno ‘int’ô casino ‘e ll’urdimi vinte minute Peluso tiraje a vvienetenne, cugliette pe scagno ‘o scianco ‘e Zuniga ca mannaje ‘a palla a scardà ‘a faccia ‘e coppa d’’o travesagno (traversa). Menu male ca nun succedette niente!
ZUNIGA 6 Don Rafele lle cagnaje ancòra ‘na vota pusizziona, mettennolo ‘ncopp’â dritta dint’ô ruolo su?o naturale e isso ‘o ‘ntreppetaje, finalmente, cu ssimplicità, scanzannose – finalmente!- ‘e fà tutte chilli bballette, nfente, jucarielle e ppiuruette ca nun servono manco ô saciccio.
ALBIOL 6,5 Zitte, zitte, zitte! ‘O spagnuolo s’è scetato turnanno a essere ‘na vera trancàra (baluardo); ajere se facette perdunà quacche sfregazzo (sbavatura) d’’e pprimme jurnate turnanno a essere cchiú attiento e ccuncentrato e sbruglianno cchiú ‘na situazziona ‘nzipeta, mo marcanno, mo anticipanno ll’avverzarie.
KOULIBALY 6,5 Zaza primma e pPavoletti po, visto ca cu Albiollo facevano palla corta, tentajeno ‘e ‘nfilarse dâ parta soja… ma isso nun facette ‘na chieja nchiudenno sempe a mmestiere e risulvenno quacche situazziona cumplessa.
BRITOS 6,5 Atalossa (prestazione) sicura d’’o lungagnone ca fove assaje cuncentrato e ddiciso a vvennere cara ‘a pella soja tanto ca sia Floccari ca [quacche vvota] Sansone nun riuscetteno maje a superarlo.
DAVID LOPEZ 6 Nun è ca se facette nutà assaje ‘mmiez’ô campo, ma contro a ‘nu centrocampo cumbattivo e curiaceo comme chillo emigliano, ‘a sustanza soja servette comm’ô ppane.
GARGANO 6,5 – Currette assaje e ssenza strafà smistaje tanti pallune e ô ssolito ce mettette tanta bbona volontà e ttanta cegna (agonismo), e nun se tiraje arreto neppure quanno êtt’ ‘âscí a cchi sî ttu e cchi songo i’ cu ‘nu guappo comme a tTaidèrro.E vva bbuono accussí! (DÔ 76° JORGINHO SV)
CALLEJÒN 7,5 Certo ca chi s’arricorda ‘e chello ca facette â tempurata (stagione) passata putesse ggiurà ca ultimamente nun è ttanto lucente (brillante) comme p’’o ppassato; po’ ppure essere overo, ma chello ca conta è ca ‘o spagnuolo sta sempe lla, lla ‘mmiezo ‘nfra urdemu difenzore e ppurtiere pronto a casticarlo comme succedette ajere ca mettette dinto ‘o terzo stuco (gol) d’’o campiunato, tre dinto a cquatto fullè (partite) jucate, capartigliero (capocannoniere) pe distacco d’’a scuatra. Niente male pe uno ca non è ancora a ll’ arriba (top).
HAMSIK 6 – Jucaje a ‘nticielle (sprazzi) ;addó putesse fà assaje ‘e cchiú s’accuntentaje ‘e faticà dint’a ll’ombra tuccanno quacche ppallone comme a cchillo ca libberaje ‘o Pipita ô cruzzo (al cross) p’’o stuco ‘e Cagliecònno. (Dô 60° DE GUZMAN 6– Trasette cchiú ca ato pe cungelà ‘o risultato, piazzannose ‘nfra centrocampo e attacco, ma senza ‘nventà niente ‘e ‘mpurtante).
INSIGNE 6– Pure facennose ‘nu mazzo tanto se vedette poco e nniente annante, forze pe cuntentà a ddon Rafele ca ll’à trasfurmato ‘e fatto a tturnante a ttutte ll’effette ca à dda curà ‘e cchiú ll’epata (la fase)’e cupertura.
HIGUAÌN 7 Pure si nun signaje, s’ammereta ‘o sette pecché nsi’ a cche se jucaje a ppallone fove ‘o meglio pe vvuluntà,ccegna (agonismo) e ‘nteliggenza ‘e juoco tutto ‘ncanalato pusitivamente dint’ô ggenio (nella volontà) ‘e cercà ‘o stuco ca lle manca comme a ll’aria. Se “cunzulaje” cu cchella granna ajuda (assist) pe Cagliecònno. Ascette dô campo ‘nu poco ‘ncazzato e dispiaciuto signo ch’êsse preferito ‘nu stuco (gol) chiuttosto ca tanti bbelli pasiglie (passaggi). Ma p’’o Napule va bbuono pure accussí.(Dô 70 ° DUVAN 6 – Trasette quanno ‘o Napule tiraje ‘e rimme ‘nvarca e ddètte ‘na mana a ttené appena appena ‘a scuatra cchiú auta).
ALL. BENÌTEZ 6 ‘A scuatra sentette ‘o fullè(gara) comme si fósse stata ‘na finale ‘e Ciampionsa. ‘E tre ppunte arrivajeno comme ‘a manna e ll’acqua ‘int’ô deserto,e ‘a tensione d’’o finale ‘e fullè (gara) dimostraje quanto servesse ‘a nichessa (vittoria).P’ ‘a verità nun è ca ‘e cuane facetteno cape d’angelo o cose ‘e ll’atu munno, ma ajere cuntava sulo ‘e vencere e cchello s’êv’’a fà e nun penzo ca ce stesse ‘na perzona a nNapule ca avesse preferito ‘e jucà bbuono o meglio e pperdere!
ARBITRO PERUZZO 5 ‘Stu guaglione vicentino aggio paura ca tenesse ‘nu poco d’enfisema pulmunare pecché se sparagnaje ‘o sciato nun siscanno e cquanno ‘o ffacette siscaje ô ccuntrario vedenno ‘na cosa pe n’ata. Pe ffurtuna ô primmo ajone vedette bbuono ca nun ce fove nisciuno ricore reclamato dê padrune ‘e casa; s’êsse però pututo sparagnà quacche cartellino jalizzo (giallo) ‘ndanno d’’e cuane e avesse avut’ ‘a essere chiú ttosto cu quacche gguappo emigliano.Ma cuntentammoce ‘e comme jette!
E ccu cchesto ve saluto e si dDi’ vo’ ce sentimmo viernarí ca vène doppo d’’o fullè(gara)d’E.L.
Staveti bbe’.
R. Bracale Brak
